Wahudumu wawili wa ndege raia wa Kenya, David Kimotho na John Muchina, wamezawadiwa na Umoja wa Falme za Kiarabu (UAE) kwa ujasiri na weledi wao wakati wa dharura iliyotokea ndani ya ndege ya kampuni ya Flydubai.
Wawili hao ni miongoni mwa wahudumu waliotunukiwa nishani ya ‘First Class Order of Zayed II’ kwa kutambua hatua walizochukua wakati wa tukio la Septemba 30, 2026, lililohusisha ndege ya Flydubai Flight FZ1073 iliyokuwa ikisafiri kutoka Dubai kuelekea Tel Aviv.
Kwa mujibu wa Ofisi ya Habari ya Dubai, tuzo hizo zilitolewa na Mwanamfalme wa Dubai, Sheikh Hamdan bin Mohammed bin Rashid Al Maktoum, kwa niaba ya rais wa UAE, Sheikh Mohamed bin Zayed Al Nahyan.
Tukio hilo lilitokea wakati ambapo rubani wa ndege hiyo Smit Machchhar anadaiwa kushambuliwa na rubani msaidizi kwa kutumia shoka, na kumjeruhi vibaya, hali iliyosababisha makabiliano ya kuhakikisha chumba cha marubani kinalindwa na abiria wanakuwa salama.
Kimotho na Muchina walisaidia kumhudumia rubani Machchhar aliyejeruhiwa na kudumisha utulivu ndani ya ndege wakati wahudumu na abiria wakikabiliana na hali hiyo ya dharura.
Machchhar, akisaidiwa na wahudumu wa ndege, abiria na marubani waliokuwa safarini lakini hawakuwa kazini, alipambana na mshambuliaji huyo, na hatimaye kufanikiwa kumdhibiti.
Baadaye, ndege hiyo ilielekezwa kwingine na kutua kwa usalama kwa dharura katika uwanja wa ndege wa Tabuk nchini Saudi Arabia, hatua iliyozuia uwezekano wa kutokea kwa janga lililohatarisha maisha ya abiria na wahudumu.
UAE iliwatambua wahudumu hao kwa ujasiri wao, weledi na kujitolea kuhakikisha usalama wa abiria wakati wa tukio hilo.
Hali ya rubani huyo pamoja na mazingira yanayozunguka shambulio linalodaiwa kutokea yamezua uchunguzi na mjadala kuhusu usalama wa usafiri wa anga, kutokana na athari kubwa zinazoweza kusababishwa na vitendo vya ukatili vinavyohusisha wahudumu wa ndege.
Kutambuliwa kwa Kimotho na Muchina kunadhihirisha jukumu muhimu la wahudumu wa ndege katika kukabiliana na dharura zinazozidi majukumu yao ya kawaida, yakiwemo kuwasaidia wenzao waliojeruhiwa, kuwalinda abiria na kudumisha utulivu katika hali zinazohatarisha maisha.
