Harambee Starlets wameandikisha ushindi mkubwa wa jumla baada ya kuwashinda Ushelisheli mabao 22-0 katika mechi mbili za kufuzu michezo ya Olimpiki 2028.
Kenya ilipata ushindi mwingine wa 11-0 katika mchezo wa marudiano uliochezwa Jumatatu tarehe 12 Oktoba 2026 katika uwanja wa michezo wa Ulinzi, na kuendeleza safari katika raundi inayofuata.
Kama ilivyokuwa katika mechi ya kwanza, mechi ya marudiano ilikuwa ya upande mmoja, huku Kenya ikitawala tangu mwanzo.
Sylvia Makungu ndiye aliyeanza kufunga bao dakika ya sita kabla ya Violet Nanjala kuongeza bao la pili dakika ya 12.
Kisha Jentrix Shikangwa alifunga mabao mawili mfululizo, akifunga katika dakika ya 17 na 20, kabla ya Vivian Nasaka kuongeza bao la tano katika dakika ya 31 na kuwapa Kenya uongozi wa 5-0 kipindi cha mapumziko.
Starlets waliendeleza kasi yao ya mashambulizi baada ya mapumziko, wakiongeza mabao sita zaidi na kukamilisha ushindi mwingine wa 11-0.
Shikangwa alikamilisha hat-trick yake, huku mshambuliaji Mwanahalima Adam akifunga mabao mawili, katika dakika za 48 na 78.
Marion Serenge pia alifunga mabao mawili mwishoni mwa mechi, akifunga bao dakika ya 87 na dakika za mwisho, huku Fasila Adhiambo akiongeza jina lake kwenye orodha ya mabao dakika ya 85.
Starlets sasa watakabiliana na Malawi ambayo ilifika fainali ya Kombe la Mataifa ya Afrika (WAFCON) mwaka huu ambayo iliibwaga Zimbabwe.
