Inspekta Jenerali wa polisi, Douglas Kanja, amekanusha madai kuwa maafisa wa polisi walimkamata au kumteka nyara mwanaharakati wa Tanzania, Twaha Mwaipaya.
Kanja alikanusha madai hayo mbele ya Jaji wa mahakama kuu ya Milimani Alexander Muteti Jumanne Novemba 3, baada ya kufika mwenyewe mahakamani kujibu wito kuhusiana na kutoweka kwa Mwaipaya.
Mkuu huyo wa polisi aliiambia mahakama kuwa alikuwa na ufahamu kuhusu kisa cha kutoweka kwa Mwaipaya lakini akasisitiza kuwa vyombo vya usalama havikuwa na rekodi zozote zinazoonyesha kuwa aliwahi kukamatwa na afisa yeyote wa polisi.
“Mheshimiwa Jaji, ningependa kuifahamisha mahakama hii kuwa mtu anayezungumziwa hayuko chini ya ulinzi wetu popote katika Jamhuri ya Kenya,” Kanja alisema.
Hata hivyo, Kanja alikiri kuwa taarifa kuhusu mwanaharakati huyo ilikuwa imeripotiwa katika kituo cha polisi cha Ruai, akiongeza kuwa uchunguzi kuhusu suala hilo ulikuwa ukiendelea.
Inspekta Jenerali huyo alitetea pia Huduma ya Kitaifa ya Polisi (NPS) dhidi ya madai kuwa maafisa wake wamekuwa wakipuuza taarifa za watu waliopotea, akisema kuwa malalamishi yanayowasilishwa katika vituo vya polisi au moja kwa moja kwa maafisa hufanyiwa uchunguzi kama kawaida.
Alipinga vikali madai kuwa polisi wanahusika na visa vya watu kutoweshwa kwa lazima, akisisitiza kuwa utekaji nyara ni kitendo cha uhalifu ambacho hakipaswi kuvumiliwa.
Kanja alifika mahakamani kufuatia maagizo yaliyotolewa na Jaji Muteti Oktoba 30, 2026, yakielekeza polisi kumfikisha Mwaipaya mbele ya mahakama, akiwa hai au amefariki, Novemba 2.
Jaji pia alikuwa amezitaka mamlaka kuwasilisha hati halisi ya kuzuiliwa kwa mwanaharakati huyo na kueleza sababu zinazopaswa kumzuia kuachiliwa mara moja iwapo alikuwa akizuiliwa kinyume cha sheria.
Wito huo ulilenga kuwalazimisha maafisa wakuu wa polisi kutoa maelezo kuhusu aliko mwanaharakati huyo, kufuatia wasiwasi ulioibuka kuhusu kutoweka kwake.
Kwa mujibu wa taarifa, Mwaipaya alitekwa nyara Oktoba 25, 2026, katika eneo la Kamulu, kaunti ya Machakos, katika mazingira yaliyopelekea kuwasilishwa kwa ombi la kisheria la ‘Habeas Corpus’ ambalo ni utaratibu wa kisheria unaozitaka mamlaka kutoa maelezo kuhusu mahali alipo mtu anayeaminika kuzuiliwa kinyume cha sheria na, inapohitajika, kumfikisha mbele ya mahakama.
