Ripoti ya upasuaji wa mwili umehusisha kifo cha daktari Job Obwaka ambaye pia alikuwa mwanachama wa bodi ya Nairobi Hospital na mshtuko wa moyo.
Msemaji wa familia, Joseph Ndungu, alisema matokeo ya uchunguzi huo yalibaini kuwa mshtuko wa moyo ndio uliosababisha kifo hicho cha ghafla cha daktari huyo kilichotokea Ijumaa jioni tarehe 1 Mei 2026.
“Uchunguzi wa maiti unathibitisha kuwa Dkt. Obwaka alifariki kutokana na mshtuko wa moyo,” Ndungu alisema.
Aliongeza kuwa ingawa sababu kuu ya kifo ilikuwa imebainishwa, uchunguzi zaidi wa kitabibu ungeweza bado kufanywa ili kutoa maelezo ya ziada iwapo ungehitajika.
Uchunguzi huo ulifanyika wakati maafisa wa upelelezi walipokuwa wakipanua uchunguzi kuhusu kifo cha daktari huyo mkongwe mwenye umri wa miaka 83 huku mamlaka zikifuatilia uwezekano wa kuhusisha kifo chake na tukio la sumu.
Wachunguzi kutoka Idara ya Upelelezi wa Makosa ya Jinai (DCI) waliiambia mahakama ya Nairobi kuwa matokeo ya awali yaliashiria uwezekano wa tukio la sumu ambalo huenda lilitokea katika makazi ya Beatrice Wangari huko Kitengela.
Wangari, mwenye umri wa miaka 45, alifikishwa katika Mahakama ya Kibera baada ya kukaa kizuizini wikendi nzima akiaminika kuwa mtu wa mwisho kuonekana na daktari huyo.
Upande wa mashtaka uliiomba mahakama iwape wachunguzi siku 14 kukamilisha uchunguzi, ukiwemo wa maiti na uchambuzi wa sumu mwilini.
“Kuna sampuli fulani zitakazowasilishwa kwa mchambuzi wa serikali na huenda kutokana na vipimo au uchunguzi huo, pia ukafanyika uchunguzi wa hali ya akili baadaye,” mwendesha mashtaka alisema.
Kifo cha Dkt. Obwaka kilitukia siku chache baada ya kushtakiwa pamoja na wengine kwa madai ya kughushi rekodi zinazohusiana na Chama cha Hospitali ya Kenya.
