IGAD YAONGEZA NCHI KATIKA UTATUZI WA MASUALA NCHINI SUDAN
Kenya imekaribisha upanuzi wa kundi la Mamlaka ya Ushirikiano wa Serikali wa Maendeleo ya nchi za Upembe wa Afrika (IGAD) nchini Sudan.
 Katika muundo huo mpya unaojumuisha Ethiopia na Somalia, Kenya sasa itakuwa Mwenyekiti wa nchi hizo nne za IGAD katika kutatua mgogoro wa Sudan. Sudan Kusini pia ni mwanachama.
 “Kenya inajitolea kukutana na majenerali wawili wa Sudan ana kwa ana ili kutafuta suluhu ya kudumu ya mgogoro huo,” alisema Rais William Ruto.
 Alikuwa akiwahutubia wanahabari siku ya Jumatatu huko Djibouti wakati wa mkutano wa 14 wa Kawaida wa Baraza la Viongozi wa Nchi na Serikali wa IGAD.
 Katika Kikao hicho, Djibouti ilichaguliwa kuwa Mwenyekiti mpya wa IGAD na Sudan Kusini kuwa naibu wake.
 Viongozi waliokuwepo ni marais Ismail Omar Guelleh (Djibouti), Salva Kiir (Sudan Kusini), Hassan Mohamud (Somalia) na Waziri Mkuu wa Ethiopia Abiy Ali.
 Naibu Rais wa Baraza la Mpito la Uhuru wa Jamhuri ya Sudan na Mwakilishi wa Mwenyekiti wa Bunge la IGAD la Viongozi wa Nchi na Serikali Malik Akar, Katibu Mtendaji wa IGAD Workneh Gebeyehu na Mwenyekiti wa Tume ya Umoja wa Afrika Moussa Faki pia walikuwepo.
 Rais Ruto alisema eneo la muda lisilo na wanajeshi linalokusudiwa kuruhusu upitishaji salama wa usaidizi wa kibinadamu nchini Sudan litawekwa ndani ya muda wa wiki mbili.
 “Katika wiki tatu zijazo, tutaanza mchakato wa mazungumzo jumuishi ya kitaifa,” alielezea.
 Kiongozi wa Nchi aliuambia mkutano huo kwamba hii itawapa watu wa Sudan jukwaa sahihi la kujadili tofauti zao, masuala yao na mwelekeo wa kisiasa ujao wa nchi yao.